Бабöлöн юбилей

Сьöкыт овны семьятöг, роднятöг. Уджалам йöрын, куртам турун, поткöтам пес, вежалуналам нимлуннэз – быдлаын миянкöт увтыр.
         Тöдвылам усьö керкуын шум – бабöлöн, Маргарита Ивановна Борисовалöн, ыджыт юбилей. Миянлö эта луныс лоис öддьöн дона. Локтiсö поздравитны бабöс  родня, Женя дядьö, внуккез. Петiсö и соседдэз.

Пызан сайын бабöлö кöсйисö уна бурсö. Баитiсö бабöлöн удж йылiсь. Меным этö быдöс öддьöн интереснö кывзыны. Бабö дыр уджалiс почтальонкаöн. И лым, и зэр, и мороз коста новйöтiс сiя почта. Газеттэз, журналлэз, письмоэз вöлiсö уна. Сьöкыт сумкаöн бок вылын ветлöтiс Несоли, Порошево, Мыс да Маскали деревняэзöт. Бабö баитiс бур кыввез быдлö:  томмеслö да пöриссеслö.  Быдöнныс любитiсö менчим бабöс. Сiя вермис öддьöн дыр баитны öтка олiсь пöрись отиркöт, дорйис нiйö.

Бур уджалöм понда бабöс сувтöтiсö почтаын начальникöн. Да бöра аслас почтальонскöй сумкаöн ветлöтiс подöн километраэз, сеталiс пенсия. Рыттэзнас гижлiс отчёттэз. Öддьöн бур, что эшö вöлi ловья менам Ӧкся прабаб. Сiя отсалiс вöдиччыны мамöкöт да Женя дядьöкöт.

Натьтö, дыр бы эшö бабö уджалiс почтаас, радуйтiс отирсö, но сьöкыт шогöт понда колiс чапкыны уджсö.

Женя дядьö внимательнöя видзöтö бабö чужöмö, гладьöтö киэсö, кöдна пыр стряпайтiсö медчöскыт пирöггез капустаöн да тшакöн. Баитö сылö уна бур кыввесö, кöсйö быдöс бурсö. Бабö сералö, сылöн синнэс дзебсисьöны чукыррес коласын, но сёравно югьялöны.

Мамö крепыта жмитö бердас бабöс, окалö сiйö, баитö, кытшöм бура любитö, кöсйö овны öддьöн дыр. Горöн сералöм кылö керкуын – сiдз бабö важын ни эз серав. Видзöтö миян вылö аслас югыт синнезнас, лукавöя сералыштлö.

Онi бабö абу ни миянкöт. А ме вежöрта, кытшöм сiя вöлi том и басöк. Веськыт спина, моднöй платтё, туфлиэз каблуккез вылын, кузь басöк юрси, югыт коричневöй синнэз. Некытшöм слово шогöт йылiсь.

Мийö öддьöн любитiм Рита бабнымöс. Сiя быдтiс миянöс. Вöлi öддьöн рад миян медодзза кыввезлö да оськöввезлö, отсалiс керны уроккез да сьылiс басöк онмöтаннэз.

 Миян семья пыр пондас помнитны дона да любимöй бабöс,  Маргарита Ивановнаöс.