Семьялӧн выныс вужжезын

   Одзжык ме эг и думайтлы, мыля баита коми-пермяцкöй кыв вылын. Кöть мый сэтöн думайтны, эд быдöс менам родвужжез баитiсö комиöн. Эта кылыс сетöм меным чужан лунсянь кыдз козин, кыдз богатство, кыдз чудо. Кыв – эта морттэзлöн история, кöда йитö öння кад чулалöмкöт. Тöда мам кыв учöтсянь, сiдз кыдз миян семьяын да деревняын быдöс йöз баитöны комиöн. Коми-пермяцкöй кыв ме понда лоö роднöйöн да донаöн.

   Велöта ассим роднöй кыв кыдз предмет начальнöй классэзсянь. Сiя öддьöн интереснöй, басöк,  богатöй да ёся. Некытшöм мöдiк кыввез вылö оз вачкись! И совсем абу сьöкыт сiйö велöтны, вöлi бы мортлöн желаннё.

   Немымда ог стыдитчы сёрнитны мам кыв вылын. Гордитча, что чужи, быдма да зорама коми му вылын. Ме понда этӧ неыджыт деревня Маскали, кӧда поздicьӧма Косинскӧй районын Коми-Пермяцкӧй округын.

   Миян семьяаным уна челядь: кыкьямыс сой да ӧтiк вон:

Семьяным миян ыджыт-ыджыт,
Но миянлӧ эд абу дзескыт.
И места быдлӧ татӧн тырмӧ,
И шудыс керкуаным быдмӧ.

Семьяаным медшöр родвужжезнас лоöны дедö да бабö. Егор дедӧ абу ни ловья, но пыр кежö кольччас менам сьöлöмын бытшöм мортöн. Сiя бура радейтiс чужанiн, семья, ас гӧгӧрись олан да вӧрва. А кытшӧм бура сiя донтiс чужан кывсӧ! Калиста бабӧ понда коми-пермяцкӧй кыв вöлi тожö донаӧн да роднӧйӧн. Сiя тӧждic, что коми кыв вермас ӧшны, сiдз кыдз сы вылын баитiссезлӧн лыд чинӧ. Бабӧ олiс кыкьямысдас квать во, но медбӧрья годöдз тӧдic чужан кыв вылын уна сьыланкыввез, частушкаэз, сёрнитаннэз, ӧвйӧтаннэз да сказкаэз, кӧднӧ висьтасьлiс  и сьывлic миянлӧ, внуккезлӧ да внучкаэзлӧ. Бабӧ сё эшӧ видзис тӧдвылас отрывок Пушкинлӧн кывбурись «Лӧз море дорын дуб зелёнӧй».

   Толя дядьӧ кужис орсны гармошкаӧн вит годсянь. Сэксянь Толя Останин эз ни янсöтчывлы аслас ёрткöт. Сылöн вöлiсö бур музыкальнöй слух да голос. Сiя некытӧн эз велӧтчы, но вермис орсны быдӧс сьыланкыввез коми–пермяцкӧй композитор Александр Клещинлiсь да Николай Пахоруковлiсь. Ӧтлаын быдöс семьяным участвуйтicö окружнöй фольклорнöй вежалунын «Орс, гармошка!» Дядьöлöн нимыс вöлi тöдса не только Косинскöй районын, но и миян округ пасьта. Ӧддьöн жаль, что оланыс сылöн орис одз…

   Айӧлӧн сойыс, Раиса Егоровна, ыджыт таланта морт. Сiя оз вермы ветлöтны, но быдöс кужö керны. А киэз сылöн былись зарниаöсь! Бура стряпайтö национальнöй сёяннэз, мастеритӧ, сьылӧ, серпасалӧ. Аслас уджжезын сiя мыччалӧ басӧк вӧрва, горт, Коми крайлiсь дона пельӧсоккез. Школьнöй музей понда гижис серпассэз: «Коми-пермяк да коми-пермячка», «Менам  дона улица», «Лолог ю», «Пера-богатырь», «Горадзуллез», «Нянь да сов».

   Аймамным ӧтлаын миянкӧт кужӧны орсны не ӧтiк музыкальнӧй инструмент вылын: пианино, баян, гармошка, гитара да балалайка вылын. Любитам выступайтны концерттэз да вежалуннэз коста, сьывны да мыччавны сценкаэз роднӧй кыв вылын.

   Пӧрисьжык сойезӧ важын ни кончитicӧ школа и ӧнi олӧны ыджыт карын. Тӧдчӧ, что мам кыв понда нiя тожӧ гажтӧмтчӧны, сiдз кыдз телефонӧт роднякӧт баитӧны комиӧн. Школаын велӧтчикӧ нiя уджалicӧ исследованнёэз да проекттэз вылын. Проект «Национальнӧй костюм» дорйисӧ округын и босьтicӧ мӧдӧдз места.

   Мийö, томжык челядь, тожö донтам да радейтам ассиным кывнымöс. Бура велöтчам школаын коми-пермяцкöй кыв да литература сьöртi, участвуйтам конкурссэзын да олимпиадаэзын. Быд годö любитам участвуйтны школьнӧй да муниципальнӧй литературнӧй конкурсын «Ловья говк». Оля сойӧ, нельки, ветлiс окружнӧй конкурс вылӧ. Семья гордитчӧ асланым творческӧй достиженнёэзӧн, ась  и пока неыджыттэзӧн.

   Свободнöй кадö семьяным любитö лыддьöтны небöггез не только роч, но и коми-пермяцкöй кыв вылын. Любимöй небöггезöн миян понда лоöны Василий Васильевич Климовлöн повесть «Гавкалöн бедь» да Иван Алексеевич Мининлöн повесть «Паныт уйис тöлicь». Радейтам лыддьӧтны асланым кыв вылын не только  художественнӧй, но и духовнӧй литература. Рыттэзнас да выходнöйез коста лыддьöтлам небöггез: «Исуслöн олан», «Библия висьттэз», «Челядь понда Библия».

   Öддьöн бур, что медбöрья годдэзö миян округын школаэзын чулавлö öтласа диктант коми-пермяцкöй кыв сьöртi. Долыт сьöлöм вылын, что эта акцияын участвуйтлiсö быдöс сойезö, а сiдзжö и ме.

   Вот сiдз мийö и оламö. Меным гажа сьöлöм вылын, что ола сэтшöм семьяын, кытöн любитöны да донтöны роднöй кыв, оз вунöтö коми-пермяккезлiсь обычайез, обряддэз да традицияэз. Гордитча, что миян дружнӧй семья зорӧтӧ кывнымӧс. Думайта: пока миян ыджыт семья пондас баитны да велӧтны мам кыв – пондас овны коми-пермяцкӧй кыв, главнӧй богатство нациялӧн:

Ась жö пыр олӧ мамӧ,

 Ась жö пыр олӧ крайӧ,

 Ась жö пыр лоас отир,

 Ась жö пыр лоас кыв!

Не весь баитӧны: «Семьялӧн выныс вужжезын!»