Иньва ю вылын сiя сулалö,

Керὄс вылö поздiсьöм кыдз кай

Шондi морос вылын дзик радъялö

Менам дона Верх-Иньвалöн край.

М. Кладова

      Быд мортлöн эм места, кытчö пыр кыскö сьöлöм, кытöн тöдса быд пельöсок,- этö чужанiн. Менам чужанiн-этö Верх-Иньва посад. Бытшöм да гажа сiя ме понда. Видзöта сы вылö да думайта, кытшöм бур места бöрйöм медодзза олiсьыс.

      Зелёнöй  вöр кытшöвтö посадсö, сайöвтö лэчыт тöввезсянь, Иньва ю миссьöтö чужöмсö, ылö-ылö нуöтö сьöкытсö да гажтöмсö. Вöзъясим керöс козьналö сöстöм ру,вайö виль юöррез. Не весь баитíс В.В.Климов -коми-пермяцкöй гижись, фольклорист: «Вöзъясим йылíсь мийö кывлам только коми нора песняись, да и то ог тöдö, мый сíя сэтшöмыс. А сíя, гажа пельöсок, кытöн одзжык йöктíкö уна нинкöм бырöтöмась, сьывтöн да орстöн том кад чулöтöмась…»

     Верх-Иньваным аркмöм важынся-важын, кытöнкö 1700-1715 годдэз коласын. 1715годся перепись сьöртi шусьöма сiя Георгиевскöй посадöн, кытöн вöлöмась квать идзасöн вевттьöм керку да учöтик пуовöй вичку.

     Уськöтчöмась  öтпыр посад вылö Купросiсь олiссез. Ёна тышкасясö Вöзъясим  керöс вылын. Вермасö локтiссесö посадшана да дыв вашöтасö горт дынсиныс. Сiдз кыдз атаманöн вöлöм Бачев, то пондасö шуны посадсö Бачевöн. 1864 годöдз сiдз шусис, а сыбöрын гижисö сiйö Верх-Иньва нимöн. Натьтö, сiйöн, что сулалö посад Иньва ю йылын.

       Историяись тöдам,что 1867 годö священник пондöм велöтны челядьöс, а 1872 годö оссьöм 4х  годичнöй школа. Вöлöм посадас  кабак да смешаннöй лавка.

        Чулалiсö годдэз, быдкодь событиэз, вежсис олан,вежсис посадлöн чужöм.

   Синöн он судзöт талун оланiннымöс. Быд годö мыччисьö мыйкö виль. Строитiсö спортивнöй комплекс,  кытчö быд рытö тэрмасьö томпöлöс.

Сэтöн чулöтсьöны соревнованнёэз, вовлöны краевöй центрсянь. Ордчöн шöрöт школа. Интернат горалö челядь шысянь. Пыр осьта ыбöс Дом Культурыöн. Эстöн  библиотека  аслас  богатöй фондöн. Эстöн жö осьтöмöсь отир понда быдкодь кружоккез. Эм челядь понда ясли-сад. Уджалö больница.

Лунíсь-лунö оссьöны магазиннэз.Эд олíссез посадас талун тысячася унажык.

 Уна бытшöм йöз зорöтíс Верх-Иньва посад. Быдкодь  учёнöйез, гижиссез да заслуженнöй  уджалíссез. А.Н.Зубов – не только коми-пермяцкöй литературнöй кывлöн, но и  национальнöй литературалöн основоположник. А.К.Ермаков, Л.Косова-Старцева, Г.Бачева- гора нима  гижиссез Верх-Иньва посадíсь;  учёнöй-химик,профессор,член-корреспондент АН СССР А.А. Яковкин; А.А.Галкин-заслуженнöй культураись уджалíсь и уна мöдíк знаменитöй морттэз, кöднöн ме верма ошшасьны…

       Ме радейта ассим гортöс, и нем донажыкыс сэсся ме понда абу.