"Дона козин"

Дона козин
Миян семьяын эм ассяма реликвия - этӧ басӧк аскерӧм пуовӧй коробка. Мамӧ висьталiс, что этӧ шкатулка. И вевдӧрас, и боккезас эмӧсь быдкодь серрез. Ӧтiклаын нiя керӧмась виззезӧн, мӧдiклаын - дзоридзоккезӧн. Рӧмыс серреслӧн быдкодь. Эмӧсь гӧрдӧсь, зелёнӧйӧсь да вежӧсь. Угӧллэзас – дзоридззез, ны коласын – полоскаэз. Мыйись жӧ нiйӧ вермисӧ керны? Мийӧ дыр видзӧтiм аймамӧкӧт. Сэсся казялiм, серресӧ керӧмась идзасiсь. Вундалӧмась квадратиккез, ромбиккез, йитӧмась ӧтамӧдкӧт да пуксьӧтӧмась клей вылӧ. Басӧксьӧтӧны шкатулкасӧ не только ассяма виззес, но и мичӧтӧмыслӧн свиттялан рӧм. Только сiдз эгӧ и вежӧртӧ, мыйӧн краситiсӧ.
Внимательнӧя кӧ видзӧтны, то туйӧ казявны, что мукӧд тороккес виззезсис усялӧмась. Мамӧ шуис, что шкатулкаыслӧ уна во ни. Сiйӧ мамӧ вайӧма Ёгва посадiсь Степанида прабаблiсь. Чулалiс уна кад, сiйӧн и серрезiсь торрес усялӧмась, доррес бырыштӧмась да сьӧдӧтӧмась, вежӧмась рӧмсӧ. Мамӧсянь тӧдi, что шкатулкасӧ прабабыслӧ жӧникыс гӧтрасикас козьналӧм. А недыр мыйись пондӧтчӧм война, кӧда вывсянь сiя абу бертӧм.
А Степанида прабабыс уна годдэз берегитӧм шкатулкасӧ, дзебӧмӧн видзӧм комодын, кӧдӧ пӧднавлӧма ключ вылӧ. Ключсӧ пыр кыскалӧма носкиас, медбы челядьыс эзӧ вӧрӧтӧ да эзӧ жугдӧ ассяма донсӧ. Только кӧр прабабыс кулӧм, шкатулкаыс оссьӧм. Матiсь отирыс адззылӧмась, что пытшкас оссяна торас мӧртлӧмась еммез, а мӧдас куйлӧмась колана документтэз. Вот мыля прабабыс дзеблӧм шкатулкасӧ!
Мамӧ висьталiс миянлӧ: «Эта шкатулкаыс ме понда ӧддьӧн дона. Степанида прабабӧ йылiсь память, ыджыт дон!» Мийӧ юасьтӧг огӧ босьтӧ сiйӧ, эд пытшкас ӧнi мамӧлӧн быдкодь пелькытшшез, доннэз да чунькытшшез. Мамӧлӧ нiйӧ козьналiс айӧ! Поди, кӧркӧ мамным сетас миянлӧ этӧ шкатулкасӧ, а мийӧ - асланым челядьлӧ. Быдӧнным берегитам святӧй донсӧ, эд эта миян семейнӧй реликвия!