Эссе "Кусӧм деревня"

Кусӧм деревня
Менам деревняын зэв мича местаэз. Эна местаэзӧт мийӧ ӧтік классісь велӧтчиссезкӧт радейтам ветлӧтны походӧ. Ми петавлім Дресвенникӧ, кыйим чери Сым юок вылын, купайтчим Камаын. Таво арнас ветлім кусӧм Исаево деревняӧ.
Паськыт туй мунӧ деревня бокӧт, кӧда пӧлӧн быдмӧны веськыт пуэз. Биӧн сотчӧны пипуэз, кушмӧны веж платтёа кыдззез. Не шы, не тӧв. Лӧня панталӧны миянӧс ӧтка ниапу да нинпу. А вӧр дорас ӧвтӧ ён уввезӧн сыспу. Нія ӧтнаныс свидетеллез ӧшӧм деревнялӧн. Карта сьӧрті, кӧдӧ ме рисуйті Паша дедӧ висьтасьӧм сьӧрті, аддзим керку да баня местаэз, важ юкмӧс. Юкмӧсісь кольччӧма только пыдын яма да важ кер.
Менам дедӧ, Павел Васильевич Панов, чужис да быдмис эта деревняын простӧй крестьянскӧй семьяын. Ӧні сылӧ кыкдас сизим во лоис, но сія ӧнӧдз нуӧтӧ ассис хозяйство, интересуйтчӧ политикаӧн, лыддьӧтӧ газетаэз, быд лун петавлӧ гуляйтны, ветлӧтӧ видзӧтны Исаево деревняись местаэз.
Мый йылісь сія думайтӧ эта кадӧ? Может, кыдз даскуим керкуа неыджыт деревня оліс обыкновеннӧй оланӧн? Но мирнӧй олӧм вӧлі дзугӧма - пондӧтчис война. Василий прадедӧс босьтісӧ война вылӧ медоддза годас жӧ. Кольччис прабабӧ ӧтнас кык челядёкӧн. Паша дедӧ вӧлі учӧт удж понда, сійӧн аслас соёккӧт пукаліс гортын. Мукӧдпырся мам босьтлывліс нійӧ сьӧрас удж вылӧ, поліс дыр кежӧ кольны ӧтнаныссӧ. Деревняын овны эз вӧв кокнит.
А, может, кыдз отир мырсисӧ му вылын: гӧрисӧ, кӧдзисӧ, косьтісӧ нянь? Ме тӧда, уджалісӧ и пӧрись, и том. Ыджытжык челядь уджалісӧ ӧтлаын аймаммезныскӧт. Уджалан луныс пондӧтчис одз, уджавлісӧ сёрӧдз, кытчӧдз быдӧс уджыс оз ло керӧма. Кӧр дедӧлӧ тырис сизим во, бригадир сувтӧтіс сійӧ ямщикӧн зернотокӧ новйӧтны вӧлӧн вартан машина. Ме ог тӧд, мый йылісь сія висьтасис. Некӧр эг аддзыв не вартан машина, не зерноток, но вежӧрті ӧтікӧ: челядь учӧтсянь тӧдісӧ сьӧкыт крестьянскӧй удж. Сыбӧрын учӧтик ямщичок асывсянь рытӧдз пондіс мӧдік челядькӧт уджавны вӧлӧн.
Может, думайтӧ, кыдз муніс школаӧ? Сія бура тӧдӧ эта кад йылісь. Школаӧ муніс, кӧр сылӧ вӧлі кыкъямыс во. Одзжык мамыс эз лэдз – гортын коліс отсасись. Сія учӧтсянь кужис керны быдӧс: гарйыны огородечын картов, дорны кӧрттув, отсавны мамыслӧ лэбтыны пӧрӧм йӧр, пилитны и поткӧтны пес. Да только разь эта? Велаліс кыйны ачыс нинкӧммез. Кыйис не только аслыс, но и мамыслӧ, и соёкыслӧ, и соседдэзлӧ.
Усис, натьтӧ, тӧдвылас дедӧлӧ и сія, кыдз узьліс пӧлатьын, гор вылын, а то и джоджын идзасовӧй матрас вылын. Новйис пониток да шабур, юрсӧ шонтіс баля кучикись вурӧм шапка. Сьӧкытжык овны вӧлі тӧлӧн – отир нуисӧ уна тшыг нужда. Пизь эз тырмывлы, и няньӧ содтісӧ пильнӧй чаг. Ох, джагыт вӧлі сёяныс. Тулысӧн ӧктісӧ пистик, пикан, шӧмкур. Гожумӧн пӧттӧдз сёйисӧ тшак, ягӧд. Косьтісӧ тӧв кежӧ.
Ме радейта кывзыны дедӧс. Гажтӧма дедӧ висьтасьӧ, кыдз ӧтік сюрс ӧкмыс сё кватьдасӧт воын деревняыс эз ло. Дедӧ шуӧ ӧні: "Сія лоис неперспективнӧйӧн".
Йӧзыс деревняись мунісӧ, колисӧ пустӧй керкуэз да ёгӧн быдмӧм йӧррез. Керкуэсӧ сэсся разисӧ. Кинкӧ нуисӧ керресӧ да сувтӧтісӧ виль местаын, а кинкӧ сотісӧ горын, кыдз пес.
Талун нем оз касьтыв деревня йылісь. Быдӧс местаыс быдмис том пипуоккезӧн да кыдзоккезӧн. Быдмас вӧр, кыдз памятник. Миян поколеннё и тӧдны оз понды сы йыілсь, кыдз татӧн олӧмаӧсь, уджалӧмась, гажӧтчӧмась йӧз.