"Парма мулöн ныв"

Парма мулöн ныв
Быд мортлöн эм аслас родина. Менам ыджыт родина – этö Россия, а чужанiнö – Парма, кöдалö таво тырис дасдас во. Ола Маскали деревняын Косинскöй округын. Эта пельöсок ме понда меддона, сiдз кыдз ме сэтöн быдма, зорама, велöтча.
Медшöр богатство округнымлöн – отир, кöдна керöны сiйö басöкжыкöн да богатжыкöн. Олöны миян вöра крайын уна уджалiсь да бытшöм йöз. Быд лунö мийö ветлöтам öтамöд дынöт и огö думайтö, кытшöм ассяма, талантливöй морттэз олöны миян гöгöр. Мийö вермам любуйтчыны ны уджöн, велöтчыны нысянь, и если колö, то корны отсöт. Миянлö колö тöдны ны йылiсь.
Сэтшöм мортöн миян чужанiнын лоö Останина Раиса Егоровна, сьöкыт судьбаа да ыджыт таланта морт, коми-пермячка.
Быдмис Раиса ыджыт семьяын, кытöн вöлicö cизим челядь. Бура велöтчис школаын, занимайтчис спортöн. Олiс кыдз быдöс нывкаэз, вöлi мечта – поступитны öкмысöт класс бöрын медицинскöй училищеö. Но лоис не сiдз, кыдз думайтiс. Ōкмысöт классын велöтчикö ветлic Кудымкарö лыжнöй соревнованнёэз вылö. И колö жö – кынмалiс… Эта бöрын том нывка эз ни вермы сувтны коккез вылö. Кыдз овны одзлань? Мый керны? Уна горзiс… Раисалöн оланыс вежсис сэк, кöр пондiс лыддьöтны духовнöй литература. Сiя эз повзьы сьöкыттэзicь, а бöрйис правильнöй туй.
«Миян Раечкалöн киэз зарниаöсь, - баитлic кöркö сылöн сой Нина, - сiйö бы невна велöтыштны, и петас сыись бур вурсись или серпасалicь». Сойыслöн кыввез лоисö быльöн.
Раиса Егоровна - ыджыт таланта морт. Сылöн бытшöм голос, музыкальнöй слух, кужö орсны нёль музыкальнöй инструмент вылын: гармошка, баян, пианино да гитара вылын. Сiя оз вермы ветлöтны, но кужö керны öддьöн уна! А киэз сылöн былись зарниаöсь!
Мастерица-рукодельница гöрдззö быдкодь паськöм: кофтаэз, шапкаэз, шарффез, носкиэз да чулкиэз. Крючокöн мастеритö бытшöм торрез, басöка вурсьö. Бура стряпайтö кöра национальнöй сёяннэз.
Медыджыт уджöн Раиса Егоровна понда лоö cерпассэз гижöм. Сiя любитic серпасавны учöтсянь. Но öнi, кöр ciя кольччис öтнас, медбы не думайтны гажтöм думаэз, пондic серпасавны. Сё частожык сiйö кыскис краскаэз дынö. Казялiс, что неумöля петö.
Медбöрья годдэзö серпасалicь гижис кыкьямысдасся унажык серпас дöра да гижöт вылын гуашöн, карандашöн да акварельöн. Сiя козьналö нiйö быдыслö, кин корас. Сылöн серпассэз öшалöны миян посадicь уна олiccезлöн керкуэзын, хранитчöны школаын да школьнöй музейын «Память». Участвуйтлö районнöй да окружнöй выставкаэз вылын.
Раиса Егоровналöн керку вачкисьö былись музей вылö. Серпассэз öшалöны öтöрын и быд комнатаын. Нiя не только югдöтöны керку пытшксö, но и содтöны бур настроеннё. Меным лоö диво, мымда жö колö вын да мыла, медбы керны этö уджсö! Кöр ме вöлi эшö учöтöн, то думайтлi, что Раиса Егоровна кончитic художественнöй училище. Но сiя нем эз кончит, велöтчис ачыс: лыддьöтic уна книгаэз искусство йылicь, велöтчис методическöй пособиеэз да журналлэз сьöртi.
Гижö Раиса Егоровна натюрморттэз, портреттэз, но медшöр жанр серпасалicьлöн – пейзаж. Аслас уджжезын сiя мыччалӧ басӧк вӧрва, горт, Коми крайлiсь дона пельӧсоккез.
Басöк вöрва йылiсь гижöмась серпассэз: «Лолог ю», «Коса ю», «Тöвся вöр», «Ой», «Ыб вылын», «Золотöй ар», «Пожумаин», «Локтic тулыс », «Март» и мöдiккез. Школьнöй музейын öшалöны серпассэз: «Коми-пермяк да коми-пермячка», «Менам дона улица», «Пера-богатырь», «Горадзуллез», «Нянь да сов».
Раиса Егоровна донтö чужан кыв, культура, тöдö асланым народлicь фольклор да художественнöй литература. Сы киэзöн серпасалöмась коми-пермяцкöй гижиссезлöн произведеннёэз: «Ва увтын пос» И.Мининлöн, «Гавкалöн бедь» В.Климовлöн, «Мичашорын» В.Баталовлöн, «Ыбшар» Т.Фадеевлöн.
«Киэз эд быдöс кужöны керны, только колö кужны нiйö уджöтны», - баитö бур кипода нывка.
Вот сэтшöм кодя да мывкыда морт олö миян посадын. Морт, кöда аслас вынöн да аслас киэзöн лöсьöтic ассис сьöкыт олансö, сувтic веськыт туй вылö. Талун мийö вермам висьтавны, Раиса Егоровна Останина – Парма мулöн ныв.
Ме думайта, что быдма тожö бур мортöн, а примерöн ме понда лоас миян землячка.