"Победаӧ пай"

Победаӧ пай
Меным даскык во. Велöтча ме кватьöт классын. Чужи ме сэтшöм кадö, что ог тöд не тшыг олан, не сьöкыт удж, не умöль паськöм новйöм…Менам шуда олан. Ме вот пыр думайта, мыля жö сiдз? Кинлöнкö бур олан, а кинкö абу адззылöм челядь кад…
Май 9 лунö миян страналöн вӧлi ыджыт вежалун – Победалöн 80 во. Ме война йылiсь тöда только книгаэзiсь, уроккез вылiсь да висьтасьöммезiсь, но вежöрта, что сьöкыта сiя сетсьöм. Ме думайта, что не только фронт вылын судзöтчис победа, но тылын. Кыдз ыджыттэз, сiдз и челядь пуктiсö ассиныс пай победа судзöтöмын. Пуктiс ассис пай победаö и менам прабаб.
Менчим прабабöс шуисö Ермакова Лидия Егоровна. Чужöм сiя Кудымкарскöй районicь Внукова деревняын, уна челядя семьяын. Синваэз пырйöт миянлӧ прабабö висьтасис вот мый.
Кöр пондöтчöм война, сылö вöлöм дас во. Медодзза жö войнася луннэзö айсö босьтöмась фронт вылö. Получитöмась сысянь только кык гижӧт. Сэсся дыр некытшöм юöр абу вöлöм. Роднöйез думайтöмась, что вийисö. А сiйö ранитöмась и сюрöм пленö. Сыбöрын – концлагерь. Кольччöм ловья и гортас локтöм только 1946 воö.
Август месяцö1942 воö фронт вылö доброволецöн мунöм 18 вося прабабöлöн пöрисьжык вон Григорий. Абу ештöм воюйтны и восö, вийöмась фашисттэс. Дзебöмась сiйö Старорусскöй районö братскöй могилаö.
Война. Уналiсь дзугис олан. Вот и прабабö мöдöм получитны образованнё, но ештöм велöтчыны только нель во, колöм мунны уджавны колхозö.
Война воэзö колхозын нiя керöмась сiйö жö уджсö, кöдö и ыджыттэс: и гöрöмась, и кöдзöмась, и пинялöмась, и вундöмась. Уджалöмась пемытсянь пемытöдз. Не пасьтавны, не кöмавны - нем абу вöлöм. Любöй погоддяö, гожумöн и тöлöн, новйöмась нинкöммез. Война вайöтöм эшö и тшыг олан. Овлöмась сэтшöм луннэз, кöр совсем вöлöм сейны нем. Еле видзчисьлöмась тулыс. Сiя кадö öктывлöмась пикан, пистик, быдкодь турун. Сiйö быдöс косьтывлöмась горын и излöмась. Пизьсис керлöмась кöвдöмоккез. Öддьöн сьöкыт вöлöм, но фронтлö отсалöмась, кыдз вермöмась, сiдз кыдз тöдöмась, что нылöн отсöт вайöтас матöжык победа. Уна посылка ыстöмась солдаттэзлö: гöрдззöм носкиэзöн да испоткаэзöн, вурöм да вышивайтöм кисеттэз..
Сьöкыт вöлöм и война бöрся воэзö. Тöлöн уджалöмась вöрын, а гожумöн сенокос вылын.
Быдöс сьöкытсö, умöльсö прабабö вермöм. Петöм жöник сайö. Öтлаын прадедöкöт нiя быдтöмась да воспитайтöмась кыкьямыс ныв. Быдöнныслö сетöмась образованнё.
1981 годö бабö петöм пенсия вылö. Бур удж понда сылöн уна грамотаэз да благодарственнöй письмоэз, медаллез: «За доблестный труд в Великой Отечественной войне 1941-1945 г», «Ветеран труда», вит юбилейнöй медаль.
Эта вежалунöдз прабабö эз ов. Олiс сiя 87 во. Но медбöрöдз быдöс уджсö сё керис ачыс. Быдлö старайтчис сетны бур совет, отсöт. Сiя олiс öтiк думаöн: мед сылöн челядь, внуккез да правнуккез (нiя сылöн 31) вöлiсö шудаöсь, эз тöдö сэтшöмсö, мый адззылiс сiя ачыс.
Прабабöлöн обида аслас судьба вылö эз вöв. Кадыс пö вöлi сэтшöм, не öтнаслö сьöкыт вöлi.
Миян страна победитiс, и ме думайта, что эта победаö пуктiс пай и менам дона прабабö.