Рассказ "Нимлун одзын вӧт"

Нимлун одзын вӧт.
Быд мортлӧн аслас вӧттэз. Кин мый йылiсь думайтiс, либо юрын видзис кытшӧмкӧ дума, эта йылiсь и вӧтасьӧ.
А менам ӧтнамлӧн, натьтӧ, не сiдз кыдзкӧ петӧ. Некӧр ог думайт сказкаэзӧ шедны, а пыр сэтчин вӧттэзам ола.
Талун только юрӧ подушка бердӧ инмис, сразу онмӧсси. И вот мый ме вӧтаси.
Мунам, бытьтӧ, ми айӧкӧт да пон Буско вӧрӧт неылын миян деревня Маскали дынын Борисковоӧт. Эта местаыс ӧддьӧн ягӧда и тшака. Йӧзсӧ позьӧ пантавны Борисковосис волӧн быд кадӧ.
Луныс гажа. Енӧж сӧстӧм, шондi кисьтӧ ассис пым югӧррез му вылӧ. Кайез пуэз вылын дзульзьӧны – сьылӧны, номмез лэбалӧны. Вӧрыс радуйтчӧ и шондiлӧ, и мошшезлӧ, кӧдна лэбалӧны неыджыт дзоридззез весьтын, и бабыввезлӧ, кӧдна нельки миян юр вылӧ озӧ полӧ пуксьыны, и кӧдзыввезлӧ, кӧдна дугдывтӧг шмоналӧны – уджалӧны асланыс поззэз гӧгӧр. Вӧр рад быдӧслӧ, кин сыын олӧ. Сiя, кыдз аймам донтӧ ассис пиэсӧ, мыйӧн вермӧ отсалӧ нылӧ. Вот эта гажа угӧлокӧ мийӧ айӧкӧт и мунiм.
Шагьям и кошшам чӧд. Айӧлӧн спина саяс неыджыт пестерок, киас учӧт дозок, кӧдаӧ сiя шуӧ ӧктыны ягӧдсӧ, а тыртӧмсӧ кисьтны пестерӧ. Менам киам неыджыт пластмассовӧй ведёрка. Буско керӧ ассис удж: нюкайтӧ быд улок и турунок, котрасьӧ ӧтмӧдӧрӧ, миян дынӧ сылӧн некытшӧм интерес абу.
Адззим ягӧда места, чожа тыртiм доззэзнымӧс и лӧсьӧтчим мунны гортӧ.
Вдруг вӧрас пемдiс. Но мало ли, думайтам, пока ӧктiсим, эг казялӧ, кыдз кымӧр кайис. Сэтчӧ Буско миян дынӧ котӧртiс, коккез коласын ӧвтчӧ-сайласьӧ, гӧныс вылас сувтчӧм, ачыс оз вувт, только никсӧ умӧлика, небасӧка. Дзар керим айӧкӧт ӧтмӧдӧрӧ и асьным повзим. Неылын миян дынсянь сулалӧ морт джын ыджыт пу ыжда. Синкыммез сукӧсь, кузьӧсь, синнэс топ оз и тыдалӧ. Нырпыссэс паськытӧсь. Тошыс и юрсиыс тожӧ кузьӧсь и нитш кодьӧсь: зелёнӧйкодьӧсь, дзорӧсь, поснит листаӧсь. Вылас мортыслӧн сера гунька кок увтӧдз, пельпон вылас неыджыт сумка, кӧдаись кульбуккез юрнысӧ мыччӧмась. Сулалӧ эта мужикыс и, миян вылӧ видзӧттӧн, шыннялӧ. Ӧмыс паськыт, пиннес бель видзӧны.
Ме айӧ вылӧ полӧмӧн видзӧта, сiя – ыджыт мортыс вылӧ.
И сэтӧн кылам голос, кӧть ӧмыс эз и оссьы:
- Мый, Юрий, сетан меным гӧснеч туйӧ ягӧдтӧ?
Айӧ шуӧ:
- Сета, раз сёян бы.
-Абу жаль, гортат эд тыр керку челядь?
- Ӧкта эшӧ, тшӧктан дак.
- Рам тэнат лолыт, чож. Челядьтӧ частожык вӧрас вайӧтлы, ась велалӧны вӧрва дынӧ, ась донтӧны горт оланiнсӧ.
Мужикыс невна сулалыштiс и сыбӧрын содтiс:
- Оз ков чӧдыс, ме и сiдз быд гожся лун потшшуйтча ягӧднам. Но аттьӧ, что эн жалейт ме понда сiйӧ. Тэнат паськыт лолыт понда ыста зоныт нимлун кежас козин.
Шуис сiдз и ӧшис. И ме сайми. Синнэзӧс осьтi и думайта, что бӧра сказка вӧтаси. А керкуын быдӧнныс узисӧ, висьтасьны вӧтӧс вӧлi некинлӧ. Куни синнэз и бӧр онмӧсси.
Асывнас, кӧр чеччи ольпасись, казялi стул вылiсь туисок ягӧдӧн и чуманокын ма. Ох и радми! Менам эд талун нимлун! Быдӧннысӧ невнаӧн козиннас потшшуйтi. Сёйикас сё думайтi, вӧрись дядьыс или айӧ мамӧкӧт меным гӧснечсӧ козьналiсӧ? Вӧтам сказкаын ме бӧра вӧлi или быль Вӧрисьыс вовлiс миян ордӧ?
Эм сiя или абу, ог тӧд. Но зато бура тӧда, айӧ и былись рам быд дынӧ и быдӧс дынӧ. Миянӧс сiя пыр велӧтӧ донтны вӧрва и йӧзӧс, некӧр и некытӧн не вунӧтны ассиным горт.