"Тӧвся чери кыйӧм"

Тӧвся чери кыйӧм.
Быд семьяын эмӧсь бур традицияэз, кӧднӧ радейтӧны да донтӧны.
Висьтася медрадейтана традиция йылiсь миян ӧддьӧн дружнӧй семьялӧн -тӧвся чери кыйӧм йылiсь. Эта бур повод быдӧннымлӧ чукӧртчыны ӧтлаын вӧрва дорын. Традицияыс вуджис миянлӧ дедӧ бӧрсянь. Мийӧ, чери кыйиссезлӧн челядь, нуӧтам сійӧ одзлань. Кыйны чери - гажа удж, кӧда кыскӧ семьянымӧс быд воӧ ю дорӧ. Ми казялім, что чериыс ёнжыка шедӧ Айму дорйисьлӧн лунӧ (февраль 23 лунӧ) да маммезлӧн вежалунӧ (март 8 лунӧ). Мыйӧн сiйӧ йитны, ме ог тӧд.
Рытсянь ӧктам мешӧккез, чери кыян ящиккез. Одз асылӧн иньдӧтчам туйӧ. Миян медрадейтана местаыс чери кыйӧм понда Кама ю. Мунам ылӧ - Кривцы деревня дынӧдз. Туйыс сэтчинӧдз абу кокнит. Часто машина сибдӧ, и мийӧ гажӧн тойлалам сійӧ. Ю дынӧ лэдзчӧ крут керӧс. Нильдам, усям, чеччам, бӧра усям - сідз тэрмасям, медбы чожажык чапкыны вугыршаттез!
Миян воннэз коласын эм бур спор. Кин кыяс медоддза чери, сія лоӧ вермисьӧн. Сiйӧн эта кадыс ӧддьӧн видзчисяна.
Осьтаэз йыын писькӧтӧмась, вугыршаттез чапкӧмась - колӧ видзчисьны! Кытшӧм жӧ рад сія, кинлӧ шедас медоддза чери! Спорыс сьӧртi сія гортын оз понды весӧтчыны.
Ошшася медбӧрья тӧвся чериалӧмӧн. Сія вӧлі медгажа! Лӧнь да шоныт погоддяӧ чери кокалiс бура. Вуграсьтӧн кадыс чулалiс чожа. Эг и казялӧ, кыдз мамӧ корис миянӧс ӧбедайтны. Сiя ӧзтӧм бипур, пизьӧтӧм ва чай вылӧ и ештӧм пӧжавны картов. Сёяныс би дынын чӧскыт! Сёям и висьтасям ӧтамӧдлӧ, кин мымда кыйис чери. О-о-о! Пашалӧ шедӧмась кык ыджытся – ыджыт сир. Миша уна ёкышшез кыйӧм. Айӧ ошшасьӧ налиммезӧн. Ме вылын медбура сералісӧ – верми кыскыны только ёкышок. Но ме и сылӧ рад! Мамӧ талун нем эз вермы кыйны. Кӧр нӧ ештас?
Чӧскыта сёйӧм да шоччисьӧм бӧрын эшӧ мунім асланым местаэзӧ вуграсьны. Лӧня кыйны чери гажтӧм, сiйӧн ми сёрнитім, висьтасим быдкодь сёрнитаннэз, сьылім, но гусьӧник, медбы не повзьӧтны черисӧ.
Чожа мыйись бипурыс кусіс. Миянлӧ локтіс кад мунны гортӧ. Ӧктім быдӧс, мый вайим, босьтім ёгӧн тыра пакет да радӧн иньдӧтчим машина дынӧ. Но эд крут керӧссӧ он орддьы, кайны колӧ. Усялім, нильдалім, бӧра усялім, но сьӧкыт керӧссӧ кайим. Локтiкас машинаас эшӧ висьтасим бура чулалӧм лун йылiсь. Гортын видзчисис эшӧ ӧтiк удж - кыйӧм черисӧ весӧтӧм.
Тӧда, эмӧсь кӧ семьяын традицияэз, то нiя пондасӧ одзлань вуджны ӧтiк поколеннёись мӧдiкӧ. Кӧр менам лоас семья, ме понда аслам челядьлӧ висьтасьны да велӧтны керны сiйӧ, мыйӧ велалi аймамсянь. Эта йитӧ семьясӧ, керӧ дружнӧйӧн да крепытӧн!